نصائح كيف تشترى ارض

الاول يلزم لنا التوضيح اننا هانركز على ارض المباني وليس الاراضي الزراعية او الارض الخاصة بالمصانع .....

ارض المباني هي الاراضي التي تقع داخل النظاق المسموح لك بالبناء عليه ويطلق عليها ارض داخل الكردون يعني ارض مباني .....

طبعا غالب المشتريين يشتروا ارض في نفس اماكن اقامتهم لعوامل ترجع لمعرفتهم بالمكان و البلد وارتباطهم بالمدينة لكن هناك من يحاول الشراء في اماكن اخرى

دلوقتي لو عايز تشتري ارض لازم تراعي الاتي

1- معرفة نظام المباني المسموح به في الحي او الجهاز المسئول عن المنطقة الواقع فيها الارض مثلا في الارض الموجودة بالمدن الجديدة بيكون البناء على نسبة من الارض وليس كامل الارض و غالبا بتكون قطع متساوية وتم تقسيمها من الجهاز المسئول عن المدينة لكن في المدن القديمة لازم تعرف التنظيم الخاضع له الارض يعني لما تيجي تبني هاتسيب كام من الارض لحساب توسعة الشارع مثلا هاتسيب متر بطول الواجهة علشان توسعة الشارع وهايكون المسموح ليك البناء على باقي المساحة .....
طيب ليه بنعرف المساحة المسموح ببنائها ده ضروري علشان تعرف هاتقدر تبني على مساحة صافية قد ايه
كمان في اماكن مش مسموح البناء فيها لاسباب اخري مثلا الارض المطلة ع النيل لازم تسيب من خط تهذيب النيل 30 متر يبقى مساحة الارض اللي اشتريتها لما تيجي تبنيها بتقل معاك كمان في بعض الناس بتبيع الارض في التقسيمات الخاصة بشركات او افراد محملة بالشوارع المحيطة يبقى النقطة دي مهمة ....

2- لازم تعرف عدد الادوار المتكررة المسموحة لك في هذه الارض في بعض المحافظات و المناطق بيكون مسموح بالتوسع الافقي و اخر مسموح بالتوسع الراسي يعني من الاخر كدة تعرف ايه المسموح ليك كام دور متكرر غير المحلات اكيد علشان تقدر تقيم الارض اللي بتشتريها

3- تعرف طبيعة المنطقة الواقع فيها الارض هل هي منطقة تجارية او سكنية لان ده عامل مهم على طبيعة الاستثمار في الارض دي لان المناطق التجارية بتكون عامل مهم في الزيادة الراسمالية لسعر الارض كمان لازم تعرف التكدس السكاني في المنطقة وهل هي منطقة مرغوبة للسكن من العامة يعني تشوف كدة في ابراج بتبني حواليك او عمارات اسعار الشقق و تسال عن الوحدات المباعة من العقار و الوحدات اللي لم تتم بيعها لان دي مؤشرات بتحدد الاقبال على المنطقة كمنطقة سكنية بالتالي بتسهل عليك معرفة واقع الطلب ع المنطقة

4- في ارض بتكون مفتوحة ع الشارع من ضلع واحد ودي بنسميها واجهة وفي ارض بتكون على شارعين من ضلعين ودي بنسميها ناصية وفي ارض بتكون مفتوحة من ثالث اضلع و في مفتوحة من اربعة اضلع ... واحد يقولي ايه اهمية المعلومة دي اقولك ان المعلومة دي مهمة لانك لازم تشوف الاضلع المطلة ع الشارع كم طولها واذاي هاتقسم الشقق في البناء بعد كدة علشان تقدر تبيع الشقق يعني مثلا لو ارض واجهة يعني مطلة على الشارع من ضلع واحد بس وطول الواجهة دي 8 متر مثلا في عمق 15 متر دي تبقي ارض مش مميزة لان التقسيم للشقق هايخلي الشكل المعماري ليها شكل سيء وهاتبقي نقطة سلبية بعد كدة في تسويق الشقق او الارض لازم تاخد بالك جدا من المعلومة دي وممكن تستشيرني او تستشير حد متخصص في الاستثمار العقاري او تستشير مهندس معماري في ابعاد الارض وكيفية تقسيمها لوحدات اظن دلوقتي انت عرفت اهمية معرفة النقطة دي

5- تعرف الاتجاهات الخاصة بالارض يعني تحدد الشرقي و القبلي و البحري و الغربي و ده ضروري علشان تعرف الشمس و الهوا هاتكون اتجاها منين يعني لو ارض واجهة واظن فسرنا معنى كلمة واجهة ومطلة في اتجاه بحري غربي تبقي الارض دي مميزة لان اتجاه الرياح في مصر بحري غربي بس هاتكون في الشتا برد جدا لان الشمس هاتضربها وقت قصير زي ما بنقول اما لو فاتحة مثلا قبلي يبقى الارض دي هاتكون حر جدا في الصيف المهم انك تعرف اتجاهات الارض كويس

6- اخر نقطة بعد لما تقيم النقط دي انك تقيم اسعار الاراضي في المنطقة اعلى و اقل سعر وتعرف المتوسط وبناء عليه مع النقط اللي فوق تحدد السعر المعقول ليك وبرضة لازم تقيم سعر المتر المباني و اسعار المحلات و اسعار الايجارات في المنطقة و تكتب كل الاسعار دي في بلوك نوت قدامك وتبدا تقارن سعر الارض لو حطيت فلوسها في البنك هتاخد نسبة 10% فائدة ولو اشتريت الارض وبنيتها هاتاجر بكام ويبقى دخلك السنوي كام لازم يكون اعلى من 10% او لو اشتريتها وبنيتها وبعتها مباني هاتكون المبيعات النهائية باسعار المنطقة كام ولازم تكون مححقة عائد 30% ع الاقل وبعد لما تعمل شوية العمليات الحسابية دي
تقدر تحدد السعر المناسب ليها.